Prof. Agus Pakpahan, Ph.D (Rektor Universitas Koperasi Indonesia)
Sharing seratan kanggo majmusunda: Kuring boga pangalaman anu rek dicaritakeun di dieu mangrupa pangalaman anu jigana moal bakal kaalaman deui saumur hirup ka hareup, nyaeta pangalaman rombongan ti Indonesia anu ngalaksanakeun kunjungan gawe ka Denmark, khususna ka kota Skagen, diaanteur langsung ku Wali Kota Skagen ka tempat-tempat anu didatangan. Meureun lain manehna euweuh pagawean ngan teuing sababna mani bageur kitu, kuring salaku pimpinan rombongan teu wani nanyakeun. Ngan kitu bae buktina, kersaning Gusti Alloh SWT. Kota Skagen kaasup bagian ti Frederikshavn Municipality, bagian kaler wilayah Denmark. Mun teu salah mah kota ieu lokasina hampir 60° lintang kaler. Kulantaran kitu, basa kuring jeung rombongan datang di Skagen bulan Oktober 1996 hawa geus tiris pisan. Maklum rombongan asalna ti daerah panas ayeuna aya di daerah geus deukeut ka kutub kaler tangtuna teu biasa ku hawa anu tiris na kabina pisan. Sakabeh rombongan ngahodhod kawas budak anu kabulusan saentas sapopoe ulin huhujanan. Pak Wali Kota harita, Mr. Erik Sorenson, surti pisan nempo rombongan anu kabulusan, padahal poe beurang keneh, karek sakitar jam 2 beurang. Tapi panon poe geus kawas rek sareupna di urang. Bulan Oktober padahal mah can ka asup usum winter anu mana sakuriling urang ngan saukur salju wungkul. Bulan Oktober masih ka asup usum gugur nyaeta sakabeh daun tatangkalan morolok marurag ngampar dina taneuh. Tatangkalan ngarangrangan kacuali tatangkalan anu daunna kawas jarum saperti tangkal pinus. “Marry, urang anteur ieu rombongan ka toko jaket heula, karunya bisi maranehna jadi es,” pok Pak Wali Kota ka Marry, patugas ti dinas perikanan lamun di urang mah, bari heureuy. Majarkeun teh bisi urang jadi patung es. Marry ditugaskan jadi pangaping rombongan kunjungan gawe salila di Denmark. “Sakalian jalan-jalan aranjeun hayang meuli jaket naon? Di dieu jaket kulitna alus jeung hargana rada miring,” ceuk Pak Wali Kota nerangkeun sekalian ngiklankeun yen jaket kulit buatan Dermark kualitasna alus jeung hargana rada murah. “Ka toko jaket kulit Pak Wali,” dua belas urang rombongan nembalan kawas ngalagukeun dina tembang rampak sekar bari katempo barungaheun pisan. “Hebat euy urang rek belanja jaket kulit anu nganteurna Pak Walikota. Mun di nagara urang mah pasti moal ngalaman kieu,” salah saurang anggota rombongan nyorakeun eusi hatena. Bener pisan anu diucapkeun ku manehna. Rombongan arasup ka jero beus. Beus na mani alus pisan, bersih jeung lalega. Pak Wali Kota oge asup ka jero beus tapi teu diuk dina korsi. Pak Wali Kota nangtung bari nyekel sepiker persis saperti juru bimbing wisatawan. Pok Pak Wali Kota kieu:” Ayeuna urang ka toko jaket heula. Ulah lila teuing milihnya lantaran urang bakal ngadatangan tempat istimewa di kota Skagen, nyaeta sumber gas bio anu dihasilkan ti ngolah limbah eusi peujit lauk salmon,” pak Wali Kota ngumumkeun yen urang ulah lila teuing di toko jaket. Toko jaketna alus, standar toko pakean di Denmark. Rupa-rupa model jaket kulit aya di dinya. Kulitna kulit asli jeung alus. Rombongan mareuli jaket. Aya oge anu meuli keur sakalian keur oleh-oleh. Kuring oge meuli hiji jaket kulit anu potongan na kawas jubah. Pikir kuring keur sakalian upama aya waktu jalan-jalan ka Michigan anu kasohor winterna kacida tirisna. “Hayu Tuan-tuan urang miang deui,” pak Wali Kota nyelukan rombongan. Kabeh nurut eureun milih jaket, kabeh antri rek mayar. “Ke sakedap kuring rek nanyakeun heula ka bank sentral sabaraha jam ayeuna harga tukeur dollar Amerika Serikat jeung Kroner Denmark ,” kasir toko ngabejaan manehna rek nanyakeun heula ka bank sentral. Jero hate kuring ngaharewos yen bener geuningan bangsa Denmark teh jujur nepikeun nanyakeun heula sabaraha harga duit dollar Amerika Serikat dibandingkeun jeung Kroner Denmark. “Pak Wali, punten ieu aya hadiah kanggo Pak Wali. Pak Wali tos nyumpingkeun pelanggan anyar,” ceuk palayan toko bari seuri. Terus manehna mikeun kaos kaki ka Pak Walikota. “Wow. Terima kasih,” ceuk pak Wali Kota bari seuri oge. Kuring jeung rombongan anu nyaksian eta kajadian ngarasa kagum ka eta budaya silih ngahargaan antara Wali Kota jeung palayan toko. Kawas na di budaya urang moal manggih budaya hubungan anu kawas kitu. “Engke aranjeun bakal nempo langsung pabrik gas bio anu asalna tina beuteung lauk salmon,” pak Wali Kota mimiti ngajelaskeun pabrik biogas. Teu kungsi lila rombongan nepi ka tujuan. Pabrik gas bio anu ngolah eusi beuteung lauk salmon teh aya di sisi laut. Kapal lauk nyandar di palabuan lauk. Terus lauk dialirkeun ka pabrik make pipa. Lauk salmon maruragan ka wadah panarima bari jeung dioyag-oyag. Oyagan ieu nyababkeun lauk salmon misah sasuai jeung ukuran, gede-leutikna. Terus lauk salmon anu geus misah eta dibawa ku conveyor ka tempat motong sirah lauk jeung tempat ngabuka beuteung lauk. Sirah lauk salmon anu geus dipotong mecleng ka conveyor anu mawa eta sirah lauk ka tempat nyieun pakan. Eusi beuteung lauk dicomot ku leungeun robot diasupkeu ka conveyor keur dikirim ka pabrik gas bio tea. Kabeh dijalankan secara otomatis. “Tah aranjeun geus nempo ku panon sorangan teknologi ngamangpaatkeun kabeh bagian lauk salmon ti mimiti sirahna nepi ka peujitna. Sirahna keur pakan, peujitna keur energi gas bio. Lauk na mah langsung dibungkus terus diekspor ka Jerman, Perancis jeung nagara sejena,” jelas Pak Wali Kota. “Aduh mani lebar pisan Pak Wali. Mun di Indonesia mah sirah lauk salmon masih payu di jual di hotel bintang lima bari jeung mahal keneh,” anggota rombongan aya anu nepikeun kebiasaan di Indonesia. Pak wali teu nembalan ngan saukur seuri. “Ampir kabeh keperluan pamanas kota Skagen disadiakeun ku ieu pabrik gas bio anu asalna tina peujit lauk,” Pak Wali Kota negeskeun. Poe eta mangrupakeun poe anu kacida pentingna dina lalakon hirup kuring. Lalakon diaanteur ku Wali Kota Skagen ti mimiti meuli jaket kulit, kuliah lapang integrasi perikanan laut, pakan, pangan jeung energi, ditutup ku jamuan makan malam ku pak Walikota. Pastina anu kawas kieu anu disebut puji syukur ka Gusti Alloh teh. Teu miceunan berkah Alloh SWT jadi runtah atawa sampah, nyieun sagala panyakit daratang kulantaran jorok. Gambaran kahirupan budaya modern anu pinuh ku kesederhanaan jeung kasataraan antara rahayat jeung pamingpina sakelas Wali Kota. Subhanalloh walhamdulillah.